आइतवार, २१ जेठ, २०८०,
काठमाडाैं,
नेपाली कांग्रेसका सभापति शेरबहादुर देउवाले पार्टीमा कसैको विरोध गरेर पार्टी ठूलो नबन्ने र पार्टीलाई बलियो बनाउने गरी काम गर्न कसैलाई नरोकेको बताउँदै बताएका छन् ।
शनिबार कांग्रेस जिल्ला कार्यसमिति ललितपुरको प्रथम जिल्ला सम्मेलनलाई सम्बोधन गर्दै उनले आफ्नो सभापतिमा रहेर काम गर्ने कार्यकाल यो नै अन्तिम रहेको र अब युवा पुस्ताकै पालो भएको प्रस्ट पारे ।
‘गाली गरेर कहाँ पार्टी बन्छ । लडाइँ गर्ने हो ? अप्ठ्यारोमा गयो भने के गनुहुन्छ ? अहिले पार्टीलाई मजबुत बनाउने हो, मैले पार्टी ठूलो बनाइसकेँ । अब त मैले सहयोग मात्र गर्छु पार्टी सभापति हुन्न,’ देउवाले भने ।
देउवाले कांग्रेसलाई अहिले आफूले देशको ठूलो पार्टी बनाएको दाबी गरे । ‘सधैँ हारेको नेविसंघ जितेको छ, सानो पार्टी ठूलो भएको छ । अब यसलाई अघि बढाउनुछ । अझ बलियो बनाउनुछ,’ उनले भने, काम गर्नुस् न पार्टी ठूलो बनाउनुस्, बलियो बनाउनुस् ।’
