शुक्रबार, २९ असार, २०८०,
काठमाडौं,
बुधबार निधन भएकी प्रधानमन्त्री पुष्पकमल दाहाल ‘प्रचण्ड’की पत्नी सीता दाहालको काजकिरिया गरिएको छैन ।
धार्मिक विधिअनुसार काजकिरिया नगर्ने सल्लाह भएको र त्यसैअनुरूप शोक मात्र मनाइएको परिवारका सदस्यहरूले बताएका छन् । बुधबार दिउँसो पशुपति आर्यघाटमा भने धार्मिक विधिअनुसार नै सीताको दाहसंस्कार गरिएको थियो । उनलाई प्रधानमन्त्री आफैँले दागबत्ती दिएका थिए । त्यस बेला दाहाल दम्पतीका दुई छोरी पनि सँगै थिए ।
यसअघि छोराको निधन हुँदा काजकिरिया नगरेका प्रचण्डले धर्मपत्नीको निधनमा पनि काजकिरिया नगरेका हुन् ।
सीताको निधन भएसँगै शोक मनाउने क्रममा परिवारका सदस्यहरूले नुन पनि नबारेको बताइएको छ । ६९ वर्षकी सीताको बुधवार काठमाडौँस्थित नर्भिक अस्पतालमा निधन भएको थियो ।
