आइतबार, २४ असार, २०८०,
काठमाडौं,
संसद्को अवरोध खुलाउने विषयमा प्रमुख दलबीच सहमति जुटेको छ ।
आइतबार बिहान प्रधानमन्त्री पुष्पकमल दाहाल ‘प्रचण्ड’, कांग्रेस सभापति शेरबहादुर देउवा र प्रमुख प्रतिपक्षी दल नेकपा (एमाले)का नेता के पि शर्मा ओली बीच सिंहदरबारमा छलफल भएको थियो ।
छलफलपछि एमाले संसद्को अवरोध हटाउन तयार रहेको प्रधानमन्त्रीको सचिवालयले जानकारी दिएको छ ।
असार १८ गतेको अभिव्यक्तिलाई लिएर राष्ट्रिय स्वतन्त्र पार्टी र राष्ट्रिय प्रजातन्त्र पार्टी पनि आन्दोलित थिए । रास्वपाले प्रधानमन्त्रीको जवाफ मागेको थियो भने राप्रपाको माग राजीनामा नै थियो ।
अहिले सभामुख देवराज घिमिरेले प्रमुख सचेतक र सचेतकहरूसँग छलफल गर्न लागेको उनका प्रेस सल्लाहकार शेखर अधिकारीले बताए ।
