बिहिवार, २५ जेठ, २०८०
काठमाडौं,
प्युठानको झिमरुक गाउँपालिकाका अध्यक्ष पितबहादुर एमसीका छोरा मिलन एमसीले कर्मचारीलाई कुटपिट गरेको आरोप लागेको छ ।
मिलनले योजना शाखामा कार्यरत कर्मचारी दीपक जिसीलाई भुक्तानी दिन भन्दै अपशब्द बोलेर हातपात गरेको कर्मचारीहरूले आरोप लगाएका छन् । उनी पूरा नभएको योजनाको भुक्तानीका लागि योजनाका अध्यक्ष रामबहादुर खड्का, सचिव गोपाल खड्कासहित गाउँपालिकाको कार्यालयमा आएका थिए ।
प्रमुख प्रशासकीय अधिकृतलाई सबै शाखाका कर्मचारी जम्मा भएर उक्त विषय जानकारी गराउने क्रममा समेत एमसीले टेलबमा पैसा फ्याँक्दै अश्लील गाली गरेको कर्मचारीहरूले निकालेको विज्ञप्तिमा उल्लेख छ । एमसीले आफू माओवादी निकट अखिल क्रान्तिकारीको केन्द्रीय उपाध्यक्ष रहेको भन्दै धम्की पनि दिएको त्याहाँका एक कर्मचारीले जानकारी दिए ।
कारबाही नभएसम्म झिमरुक गाउँपालिकामा अत्यावश्यकबाहेकका सेवा प्रवाह अनिश्चितकालका लागि बन्द हुने कर्मचारीहरूले जनाएका छन् ।
कर्मचारीहरूले मिलन एमसीलाई कारबाही गर्न जिल्ला प्रशासन कार्यालय र जिल्ला प्रहरी कार्यालयसँग आग्रह गरेका छन् ।
