शनिबार, १६ असार, २०८०,
काठमाडौं,
दलित भन्दै डेरामा बस्दै आएका दुईजनालाई घरबाट निकाल्ने घरबेटीलाई दाङ प्रहरीले पक्राउ गरेको छ ।
घोराही उपमहानगरपालिका वडा नं. १७ का ताराप्रसाद पोखरेललाई शनिबार पक्राउ गरी अनुसन्धान थालिएको छ जिल्ला प्रहरी कार्यालय दाङले जनाएको छ ।
पोखरेलले आफ्नो घरमा भाडामा बस्दै आएका अछाम पञ्चदेवल विनायक नगरपालिका– ७ पुल्तोलाका महेन्द्र बिक र हुम्लाको अदानचुली गाउँपालिका– ३ का अंगराज नेपालीलाई डेराबाट निकालेको प्रहरीले बताएको छ ।
प्रहरीले जातीय छुवाछुतअन्तर्गत मुद्दा दर्ता गरी कारबाही गर्ने तयारी गरेको र दोषी उपर कडा कार्वाही माग गरेको नेपाल दलित मुक्ति मोर्चा लुम्बिनी का सचिब दुर्गा बहादुर विश्वकर्मा ‘ अबिरल ‘ ले बताउनु भयो ।
घटना बाहिर आएपछि प्रेस सेन्टर दाङ, दलित पत्रकार संघ दाङ, नेपाल दलित मुक्ति माेर्चा लुम्विनी प्रदेश लगायत विभिन्न संघसंस्थाले विज्ञप्ति जारी गरी विरोध जनाउँदै दोषीमाथि कारबाहीको माग गरेका छन् ।
