बिहिबार, २१ असार, २०८०,
काठमाडौं,
नेपाली काग्रेसले केन्द्रीय समितिको बैठक बोलाएको छ ।
सभापति शेरबहादुर देउवाले २७ असारका लागि बैठक आह्वान गरेका हुन् । बैठक अपराह्न १ बजे केन्द्रीय कार्यालय सानेपामा बोलाइएको छ ।
झन्डै एक वर्षपछि बोलाइएको कांग्रेस केन्द्रीय समिति बैठकमा आक्रामक छलफल हुने देखिएको छ ।
बैठकका एजेन्डा
– प्रदेश र प्रतिनिधिसभा निर्वाचन र उपनिर्वाचनको समीक्षा
– सरकार फेरबदलमा पार्टीको भूमिका
– आगामी रणनीति
– भ्रातृ संस्था र विभाग गठन, कोषाध्यक्ष मनोनयन
– नीति अधिवेशन
– नेतृत्वको कार्यशैली
– समसामयिक राजनीतिक विषय
महामन्त्रीद्वय विश्वप्रकाश शर्मा र गगन थापासहित इतर समूहले नेतृत्वको कार्यशैलीसहितका विषय उठाउने तयारी गरेपछि बैठकमा सघन छलफलको सम्भावना छ । एता संथापन पक्षभने निर्वाचनयता नाटकीय रूपमा प्रतिपक्षमा पुगेको पार्टीलाई सत्तारूढ दल बनाउन नेतृत्वको महत्वपूर्ण भूमिका रहेको भन्दै प्रतिरक्षाको मनस्थितिमा छ ।
‘निर्वाचनपछिको पहिलो बैठक भएकाले निर्वाचनको समीक्षा, सरकारको कार्यसम्पादन, पार्टीका नयाँ कार्यक्रम र आगामी रणनीतिसहित समसामयिक विषयमा छलफल हुनेछ ।’
इतर समूह प्रदेश र प्रतिनिधिसभा निर्वाचनको समीक्षा, गठबन्धनको औचित्य र नेतृत्वको कार्यशैलीलगायतलाई मुख्य रूपमा उठाउने तयारीमा छ । समग्र विषयमा गम्भीर छलफल हुनुपर्ने, बैठकलाई औपचारकितामा सीमित गर्न नहुने र नेतृत्वले आलोचनालाई स्वीकार गर्न तयार हुनुपर्ने लगायतका एजेण्डा इतर समुहका छन् ।
महामन्त्रीद्वय शर्मा र थापासमेतले सभापति देउवाको कार्यशैलीमाथि प्रश्न उठाउने तयारी गरिरहेका छन् । महामन्त्रीद्वयले सभापति देउवाको कार्यशैलीप्रति असन्तुष्टि जनाउँदै आएका छन् । बैठकमा देउवाले आफूहरूलाई निरन्तर बाइपास गरेको विषयलाई महामन्त्रीद्वयले उठाउने तयारी गरेका छन् ।
नेपाली कांग्रेसका नेताहरू बैठकमा सबै विषयमा गम्भीर छलफल हुने बताउँछन् ।
