६ मंसीर बर्दिया । बर्दियामा दुईवटा मोटरसाइकल ठोक्किँदा एक जना महिलाको मृत्यु भएको छ । ठाकुरबाबा नगरपालिका १ डुम्रेनी गाउँमा दुई मोटरसाइकल ठोक्किँदा एक महिलाको मृत्यु भएको छ भने अन्य एक जना घाइते भएका छन् । सोमबार राति भे९प २७८० नम्बरको मोटरसाइकल र भे३प ६३६७ नम्बरको मोटरसाइकल ठोक्किँदा दुर्घटना भएको जिल्ला प्रहरी कार्यालय बर्दियाले जनाएको छ ।
दुर्घटनामा स्थानीय ४६ वर्षीय मोतिसरा शाहीको मृत्यु भएको हो । उनी ४५ वर्षीय सुरतबहादुर शाहीले चलाएको भे९प२७८० नम्बरको मोटरसाइकलमा बसेकी थिइन् । उद्धार गरेर उपचारका लागि नेपालगन्ज लैजाने क्रममा शाहीको बाटोमै मृत्यु भएको बताइएको छ ।भे३प ६३६७ नम्बरका मोटरसाइकल चालक सोही ठाउँकै रुपानन्द न्यौपाने भने घाइते भएका छन् ।
