आइतबार, १४ जेठ, २०८०
कोशी प्रदेशको प्रदेश सभाको दोस्रो तथा बजेट अधिवेशन आज दिउँसोदेखि सुरु हुँदैछ । बजेट अधिवेशनको पहिलो बैठक दिउसो २ बजेका लागि बोलाइएको छ ।
प्रदेशको बजेट अधिवेशनलाई लक्षित गर्दै आज बिहानैदेखि पहिचानवादीहरुले प्रदेश सभा भवन अगाडि प्रदर्शन गर्ने तयारी गरेका छन् ।
गत फगुन १७ गते प्रदेशको नाम कोशी राखेपछि पहिचान पक्षधर असन्तुष्ट छन् । प्रदेश १ पुनः नामाङ्कन संघर्ष समिति गठन गरेर आन्दोलनमा उत्रिएका पहिचानवादीले आज बिहानैदेखि प्रदेश सभा अगाडि प्रदर्शन गर्ने तयारी गरेका हुन् ।
प्रदेशको नाम संसोधन गर्ने थलो प्रदेश सभा नै रहेकाले प्रदेश सभा केन्द्रित आन्दोलन सुरु गरेको आन्दोलनका नेता प्रेम येक्तेनले वताए । पहिचान आन्दोलनकर्ताहरुले प्रदेश सभा भवन घेर्ने तयारी गरेको र आन्दोलन शान्तिपूर्ण हुने उनको भनाई छ ।
एमाले संसदीय दलका प्रमुख सचेतक रेवतीरमण भण्डारीका अनुसार प्रदेश सभा अधिवेशनको प्रथम बैठकको कार्यसूची तयार भइसकेको र प्रदेश प्रमुखले पठाएको पत्र सुनाएपछि प्रदेश ऐन संसोधन विधेयक पेस हुनेछ । प्रदेश सरकारले जारी गरेको २ वटा अध्यादेश टेवल गर्ने र दलका तर्फबाट सम्बोधन गर्ने कार्यसूची पनि छ ।
नामाङ्कनपछि पहिलो पटक आज बैठक बस्दैछ । गत फागुन १७ गते नाम राखेपछि स्थगित भएको प्रदेश सभाको पहिलो अधिवेशन चैत २९ गते अन्त्य भएको थियो ।
