११ भदौ, काठमाडौँ । पल शाह र दीपिका प्रसाईं स्टारर फिल्म ‘मायावी’ तिहारको लक्ष्मीपूजामा रिलिज हुने भएको छ । निर्माता राज कटुवालका अनुसार यो फिल्म कात्तिक १५ गते आउने निश्चित भएको छ ।
निर्देशक भट्टराईले तिहारको बिदाको अवसर पारेर रिलिज डेट लिइएको जानकारी दिए । फिल्मको मुख्य भूमिकामा पल शाह र दीपिका प्रसाईं छन् । लभस्टोरी फिल्ममा आफूलाई प्रमाणित गरिसकेका भट्टराई मायावीलाई आफ्नो ‘ड्रिम प्रोजेक्ट’ मान्छन् ।
पल र दीपिकासँगै फिल्ममा सुशील सिटौला, समिम खान, करिष्मा श्रेष्ठ, प्रशान्त ताम्राकार, लक्ष्मी गिरी, रवि डंगोल, राजाराम पौडेल, अंशु महर्जन, रमा प्रसाईंलगायतको अभिनय छ । समिमले यही फिल्मबाट डेब्यु गर्दै छन् ।
फिल्मका निर्माता राज कटुवाल,चन्द्र पन्त र ध्रुव प्रसाद न्यौपाने हुन् । प्रविन भट्टराई र करण सिंह कार्यकारी निर्माता रहेको फिल्मको सह–निर्मातामा राजु पराजुली, रमा प्रसाईं र सुमित ओली छन् ।
‘एक्टर’ र ‘मायावी’को भिडन्तले फिल्म क्षेत्रमा ठूलो तरंग पैदा गराउने निश्चित छ । किनभने, दुवैमा ‘स्टार’ छन् । यो प्रदीप र पलको स्टारडम मापन गर्ने परीक्षा पनि हुनेछ । तिहारदेखि छठसम्म शनिबारसहित ६ वटा विदा भएकाले ‘मायावी’का निर्माताले रिलिजका लागि कात्तिक १५ उचित मिति ठानेको हुनुपर्छ । त्यसो त अहिले एउटा मितिमा दुईटा फिल्म नेपालका हलले सजिलै धान्न सक्छन् ।
‘मायावी’मा पल र दीपिकासहित सुशील सिटौला, समिम खान, करिश्मा श्रेष्ठ र प्रशान्त ताम्राकारको अभिनय छ । नाम चलेका दुई कलाकारको फिल्म एकै मितिमा आउने निश्चित भएपछि दशैं जस्तै तिहारको बक्स अफिस भिडन्त पनि रोचक हुने देखिएको छ ।
